Cargando eventos

XVI Encontro da Banda Sinfónica Galega

A Banda Sinfónica Galega, dependente da Federación Galega de Bandas de Música, realizará o seu XVI Encontro entre os días 29 de xullo e 3 de agosto.

PROGRAMA EFEMÉRIDES 24

Brotando da inspiración da conmemoración de efemérides centenarias, preséntase un programa configurado cun repertorio ligado ó ano 24 dos séculos XIX-XX-XI, no que se engloba unha perspectiva estilística variada.

No repertorio clásico da “harmoniemusik” que nace no século XIX trala extensión dos grupos de música de cámara, temos como referente a obra de Mendelssohn que escribe en 1824; un século despois, seleccionando o mellor repertorio sinfónico de 1924 temos a maxestuoso poema sinfónico de Ottorino Respighi; e situándonos no presente ano, o 24º do século XXI, estreamos a obra do xoven e talentoso compositor galego Santiago Barreira.

Péchase o programa coa terceira sinfonía de Thomas Doss, de composición recente, mais construída baixo a influencia de Anton Bruckner, nacido precisamente en 1824, e con citas da sinfonía nº9 de Beethoven, que foi estreada nese mesmo ano.

No Encontro interpretaranse o seguinte repertorio:

Ouvertüre für Harmoniemusik, de Felix Mendelssohn e revisión de John Boyd.
Pini di Roma, de Ottorino Respighi e transcrición de Yoshimiro Kimura.
Imaxes Olívicas, de Santiago Barreira Davila. [Estrea absoluta. Premiada no Concurso Galego de Composición] – Symphony of Freedom, de Thomas Doss

A orde de chamamento verá ditaminada polas probas de acceso que se realizaron no ano 2023, cunha duración de dous anos. Lembramos que a relación das cualificacións obtidas se pode consultar aquí. Abrirase un prazo de confirmación de asistencia que será comunicado de forma privada.

Como novidade, o encontro deste ano consiste nunha residencia artística na Cidade da Cultura. É a primeira vez que a Direción Xeral de Cultura e a Fundación Cidade da Cultura van apoiar a residencia dunha entidade, xa que ata agora só foron persoas físicas.