Concurso Galego de Composición

A Federación Galega de Bandas de Música convoca unha nova edición do Concurso Galego de Composición para banda de música, que ten como obxectivo primordial fomentar e estimular a actividade musical como parte esencial do patrimonio cultural galego, mediante a creación de obras inspiradas na nosa cultura e tradición, destinadas especificamente a seren interpretadas por bandas de música.

As persoas compositoras poderán participar en diferentes categorías, segundo o grao de dificultade e os cadros de instrumentación recollidos nas bases.

- Poderán concorrer persoas sen limitación de idade ou procedencia, con tantas composicións como desexen.
- As obras deberán ser orixinais, inéditas, non creadas por encargo, nin premiadas nin interpretadas previamente baixo ningún título.
- Permítese calquera tipo de estética e estilo compositivo.
- Valorarase especialmente que a obra promova a cultura galega. Para iso, o xurado terá en conta as alusións a elementos artísticos, culturais ou tradicionais galegos sempre que estean debidamente xustificadas mediante un documento explicativo.

📌 Novidades da edición 2025

Nesta XVIII edición consolídanse os cambios introducidos nos últimos anos e incorpóranse novas melloras que reflicten a evolución das bandas de música galegas:

- Categoría de Música Popular Galega, dirixida a creacións inspiradas na tradición musical do país (muiñeiras, xotas, pasodobres, alboradas...), con liberdade formal e estética.
- Categoría de Iniciación, cunha instrumentación flexible que facilita a interpretación das obras por bandas de diferentes formatos e niveis.
- Revisión dos cadros instrumentais, co obxectivo de adaptalos á realidade actual das bandas e garantir unha maior versatilidade nas interpretacións.
- Novas condicións técnicas, como a obrigatoriedade de duplicar o contido musical dos instrumentos opcionais noutros obrigatorios, ou a adaptación ao piano/teclado no caso de utilizar arpa.

A inscrición comezará o día 1 de xuño e rematará o día 30 de setembro de 2025.