Banda de música Popular de Rubiós
Chan da Bouza s/n - Rubiós
bandaderubios@hotmail.com
http://www.popularderubios.es/
620076972
Os comezos da Banda de Música Popular de Rubiós datan do ano 1892. Existía un pequeno coro na parroquia e o párroco D. Evaristo Senra esforzouse por conseguir o unha Banda de Música. O primeiro mestre foi Manuel de Tomás, ao que sucede na dirección D. Manuel Novoa, veciño de Rubiós e compositor da muiñeira “Mozos do Penedo”. Coa guerra civil a banda quedou sen a maior parte dos seus compoñentes e a emigración contribuíu a que durante varios anos a banda deixara de existir.
A partires dos anos 50 leváronse a cabo distintos intentos de recuperala banda. Destaca o labor de D. Alfonso Méndez Méndez arredor de 17 anos. No 1969 e no ano 1974 houbo outras tentativas, pero ningunha conseguiu o seu obxectivo.
En 1985,o pleno da Corporación das Neves axuda ao rexurdir da Banda de Música de Rubiós. Comezaron a impartirse clases de solfexo, da man de D. Eugenio Fontán, nativo de Rubiós. No 1987 faise a presentación oficial da Banda de Música Popular de Rubiós no concello de As Neves, baixo a batuta de D. Ramón González “Viceiro”. Asume a dirección D. Rafael Pérez Dopeso ata 2014, D. Adrián Viñas Alonso de 2015 a 2017 e dende entón o director é D. David Trastoy Oseira.
A banda conta cunha escola oficial de música, tendo case un cento de alumnos. Conta coa Banda Infantil e a Banda Xuvenil de Rubiós.
A banda participou en varias edicións do Certame Provincial de Bandas Populares organizado pola Deputación de Pontevedra, acadando nos anos 2002, 2003 e 2005 terceiros premios na segunda categoría, nos Certames Zonais en todas as súas edicións, e tamén en varias edicións do Certame Galego de Bandas, organizado pola FGBMP, acadando no 2010, o premio á mellor interpretación de obra de autoría Galega e máis recentemente, no ano 2019 o terceiro premio para bandas da sección segunda.
A máis, a banda de música organiza anualmente diferentes actos culturais como concertos de todo tipo, convencións e intercambios con outras asociacións musicais, e por suposto actúa en festas e festexos populares por toda a xeografía de Galicia e norte de Portugal, así como ten actuado na provincia de Valencia, Madrid, Asturias, Zamora e nas festas de Dax en Francia.
A banda de música pode actuar en todo tipo de eventos adaptando o seu repertorio ao requirido polas comisións de festas ou organizadores, ofrendo dende música clásica para concertos en auditorios, música popular e tradicional, bailables para verbenas, música relixiosa para procesións, colaboracións con vocalistas ou corais etc …
